مسلسلات الصابون الرمضاني

 الزمان 1930 .. المكان امريكا ظهر نوع من الدراما التليفزيونية السيئة جدا اللي كانت بتعتمد علي حبكات ضعيفة وابطال كتير و علاقات مشبوهة و تطويل ومط واقاع واقع .. زي مثلا المسلسلات التركي ( نور ومهند ) مثلا

- ف كانت الاعلانات اثناء عرض هذه المسلسلات الرديئة رخيصة جدا قامة شركات المساحيق الغسيل والتنظيف زي ( برسيل / بيريل / فيري )
عملت اعلانات ف المسلسلات دي ..  و بعد شوية لحظو ان منتجات الصابون بعد م عملت  الاعلانات زادت مبيعاتها ف ركزوا شوية لقو السبب ان الدراما الواقعة دي بتشوفها ربات البيوت اللي بيكونوا فاضيين الصبح بدري او بعد العصر كده . ف اطلقوا عليها اسم مسلسلات الصابون او Soap opera

- ف رمضان ده الحمد لله دراما الصابون المصرية - من وجهة نظري - الحمد لله فشلت جماهيريا ونقديا زي  مثلا
( استاذ ورئيس قسم ،ذهاب وعودة، حالة عشق، مولانا العاشق ،حق ميت)

وغيرها من راما الصابون السخيفة اللي احدثها تجيب تخلف و بترسخ افكار متخلفة وكراهية وشريرة وعنصرية وعدوانية  وعدم التفكر المنطقي ف اي شيء ف الحياة...

والفشل ده دليل علي الناس خلاص عايزة مستوي افضل من الدراما ورافضة صابونهم...

وانتصرت مسلسلات الافكار الجيدة اللي بتحترم عقل و وقت المشاهد - من وجهة نظري برضه - زي العهد و لعبة ابليس وظرف اسود و بعد البداية  وغيرهم .. شكرا لكل صناعها...

ملحوظة / لو حاسس ان فيه مسلسل من اللي صابوني من المذكور اسمهم متشاف او معلم مع حد لأي سبب تأكد ان الناس دي من عشاق دراما الصابون من غير م يعرفوا لأننا الحمد لله عملنا لها جمهور كبير ف الكام سنة الاخير ...

#مسلسلات_رمضان2015

أقصر مما ينبغي...

الحياة لدينا اقصر مما ينبغي ...
---------------------------
الحياة ف مصر قصيرة جداً لدرجة ان معظم الاباء بيفشل ف تحقيق احلامه لانه تقريباً لحد سن الـ40 مش بيكون عارفها او المستوي الاصعب انه مش عارف يعنى ايه احلام اساساً .. وكمان لانه بيكون مسحول ف مهمة تحقيق حلم ابوه اللي فشل الاب نفسه في تحقيقه ف معندوش وقت ولا حق ولا طاقة يحلم لنفسه او يتعلم يحلم او يعرف يعني ايه حلم من الاساس...

ولانه ولد نبيه " بحكم الچينات " طبعاً يقرر ان يبقي مختلف ويعمل حاجه جديده وهي انه يخلف له حتة عيل يحقق فيه احلامة اللي لم يكن لديه متسع من الوقت لإدركها وتنفذها ف الوقت المناسب...

وبحكم العادة والتعود يتأكد المسكين ان مافيش " احلام " غير بتاعة برنامج Arab Idol...

ويستمر....... ويتسمر.......ويستمر..........................

#الـLoop_الاعظم_ف_التاريخ

عشرة حقائق لا تعرفها عن " ستيف جوبز "

جميعنا نعرف ستيفن بول "ستيف" جوبز ولد عام 1920ق.م مخترع وأحد أقطاب الأعمال السُفلية في قرية العوامر الغربيه مركز ابوتشت محافظة قنا. عُرف بأنه المؤسس والمدير التنفيذي السابق ثم رئيس مجلس إدارة شركة بسكومصر وهو أيضًا الرئيس التنفيذي لشركة " الشمعدان"  ثم عضوًا في مجلس إدارة شركة " سامبا " بعد ذلك وحتى وفاته؛ وأثناء إدارته للشركة استطاع أن يخرج للنور كلاً من سندوتش الماكنتوش (ماك) فراخ و لحمة وثلاثة من انواع مراوح السقف وهم (آيبود) و(آيفون) و(آي باد).

 ولكن هناك العديد من الاختراعات الهامة والمتنوعة لـ" ستيف " الغائبة عنا .. اليكم بعض منها. 

1- اختراع الإشعال الذاتي في البوتاجاز
2- اختراع " وابورالظلط "
3- اختراع البردعة
4- اخترع البراية ام مرايه
5- اختراع الشبشب ابو صوبع
6- اختراع المسدس الخرز
7- اختراع دقن الفنان سمير الاسكندراني 
8- اختراع بنك الحظ و السلم والتعبان.
9- اختراع الفحم والمعسل الطبي " يباع بالصيداليات "
10-اختراع الدورة الشهرية
11-اختراع الزيت الحار
ولم تتوقف الإنجازات الي هذا الحد لكنه ايضاً صمم كل المعارك في الفيلم العالمي " قبضة الهلالي "
وقد حصل عن مجمل هذه الاختراعات لقب " المخترع الصغير " 
وتوفي" ستيف " عام 2011 اثر سقوطه من علي سقاله بالدور الـ13 حيث كان يقوم بطلاء اختراعه الجديد..

عن يوم اليتيم

مش فاهم يعنى ايه " يوم اليتيم " وازاي مناسبة حزينة زي دي يبقي اسمها " الاحتفال بيوم اليتيم " احتفال بمأساه ازاي ؟ اللفظة المستخدمة اولاً غلط .. ثانياً الاهتمام بالافكار الغريبة دي بيخلق مع الوقت مشاكل كبيرة ف المجتمع .. أظن ان النبي محمد " عليه الصلاة والسلام " لما قال الحديث بتاع كافل اليتيم .. كان يقصد اللي هيراعي اليتيم اللي يستحق المساعده ف انه يعيش حياة كريمة سوية علي المستوي المادي والنفسي يعنى يبقي عنده مايكفيه من فلوس وكمان من حنان وعطف يغذي بيه روحه ..
احنا بقي بنحتفل بيه ليه ؟ علشان نفكر اليتيم انه يتيم ونحتفل معاه بذكري المفروض اناه حزينه بالنسباله ؟ ولا بنفكره انه اقل من الاطفال التانية اللي ف نفس سنه ف يطلع مُعقد وحاسس ديماً انه ناقص شيء ؟ 

الخطورة ف الموضوع ده انه مع الوقت بيتزرع بدون م ناخد بالنا جوا نفوس الاطفال اليتامه دول انهم اقل من غيرهم ف بيحصل حاجتين مهمين جداً لهم اثر كبير ف المجتمع الاول انه بيحس انه اقل ف بيعيش طول حياته ف الحاله دي والوضع ده انه قليل وانه مش زي باقي الناس وده بيأثر اكيد علي شكل حياته اسلوب تفكيره كله ..
او الاخطر انه لو ف يوم اليتيم اللي اتربي علي انه ناقص وانه مش زي باقي الخلق ومسك سلطه او بقي مدير ف شغله مثلاً او مثلاً اطوع ف الجيش او بقي امين شرطة وبقي معاه سلطة ممكن بقي يحب يكمل النقص اللي حس بيه طول حياته ف يبقي جبروت ويبقي شرير يبقي متسلط ..
ياريت مانحتفلش بعيد اليتيم تاني لانه مش منطقي انه يبقي عيد ،بس نرعاهم انهم يكونوا اسوياء نفسياً ومادياً ناجحين مش حاسين انهم اقل او درجة تانية او محتاجين عطف و شفقه ولا ان حد يشحت عليهم ويتاجر بيهم ف اعلانات تجارية..

عن نعمة النسيان.

الراجل مننا عنده قدرة عجيبة علي النسيان بتزيد القدرة دي تلقائياً لما يكون مرتبط بينسي بشكل تلقائي كبير جداً عيد ميلاد

( حبيبته / خطيبته / مراته ) عيد جوازهم عيد حبهم اللحظات الحلوة اللي مرت عليهم ذكريات الساحل السنة اللي فاتت صنية الفراخ اللي ماما بعتتها وهكذا اشياء بتعتبرها الست مش مفروض تتنسي . بس الحقيقة انها ” ميزة ” مش عيب ..” ولكن أكثرهم لا يعلمون ” .

الراجل بطبعه بطبيعته ملول بيزق بسرعة لو عليه عايز شلة صحاب واكل وكنبه وبوكسر وتليفزيون ويعيش عمره كده ..

تخيلي الراجل الملولو ده لو افتكر كل الحاجات اللي انتي بتفتكريها . هيزهق منك ف خلال قد ايه ؟!!

احمدو ربنا اننا بننسي… ربنا يديمها عليكم نعمة

صليل الصوارم نشيد الأُباة نسخة السبكي

التنفيذ اخد ساعة تقريباً .. بس خلاص 

شير ف الخير 

عن فلسفة وعقيدة الجيش

عن فلسفة وعقيدة الجيش ....
===============
ف الحقيقة صعبان عليا الناس اللي بتموت ف سينا بدون سبب او ف الحقيقة بسبب " الدولة المصرية "  ومش قادر امنع نفسي من اني اشوفهم ضحايا وشركاء في جريمة قتلهم ولو بقدر بسيط جداً.

المشكلة كلها تتمثل في عقيدة الجيش المصري " الدينية " اللي بتبيع لكل من ينتمي إليها فكرة انه ممكن يموت ف اي وقت بس الميزة اللي بيقدمها الجيش له انه هيبقي " شهيد " أي ان الدولة المصرية بتبيع لأفراد الجيش المصري فكرة لا تملك عليها اي دليل ولا قدرة وهي " الشهادة " اي دخول الجنة بسرعة الطلقة اللي مات بيها هذا الشخص سئ أو سعيد الحظ " الله هو اعلم " ...

ف الموضوع ده بيبان عند المؤسسة العسكرية مشكلتين معتبرين تعالوا نعتبرهم ...

الاولي عند الشخص المصدق الفكرة وانه بيبقي متدين ف بيشتري ان لما الدولة تقول له " تبيع له " فكرة الشهادة وانه هيموت شهيد وكده ف بيشتريها ويصدق وبالبلدي كده بيشتري " سمك ف ميا "

و النوع التاني بقي اللي مشتراش من الدولة كلمها بس هو رضي بيه وسكت علي امل ان مش هيحصل له حاجه .. ف بسكوته بيقنع الدولة انها صح فتفضل الدولة تبيع الفكرة للناس .

والكلام ده طبعاً مش دعوة ان الناس ف المؤسسة العسكرية تسيبها " لان حتي لو ده حصل " المؤسسة العسكرية ف الدولة بتُجبر الاف كل سنة علي التجنيد الاجباري وإنهم ممكن يضحوا بنفسهم وبحياتهم وبأحلامهم مقابل حاجه لا يملك احد علي  الارض دليل ولا قدرة عليها وهي " الجنة بعد الشهادة "

 بس دعوة ان المؤسسة العسكرية نفسها تبص من زاوية تانية . زاوية تعتبر فيها الرجل العسكري اهم شئ فيها ف تطور من نفسها وتحاول بقدر الامكان انها تحمي الرجل المهم ده بنفس الفكرة اللي بتحمي بيها وزير او رئيس الدولة من اي خطر.

طبعاً شئ نبيل جداً وعظيم جداً ان حد يضحي بحياته مقابل حياة كثير من الناس وحمايتهم من خطر عليها أو انه يبقي طمعان ف الكرم الإلهي ف انه يدخل الجنة كمكافأه بعد ان اختار " وكان فعلاً مافيش غيره " انه يضحي بحياته؛ بس برضه ده مش بيبقي بالجبر ده لابد يكون اختياري انا ؛ انا اخد قرار اني اضحي بحياتي بمقابل او بدون لان الدولة ماتحمنيش وتحطنى ف اماكن خطر علي حياتي وتقولي هتموت شهيد وانا اصدق واشتري الكلام السازج ده يبقي انا لمؤاخذه حمار لمؤاخذه يعنى ...

او ان الدولة تقولي وتكتبلي ف كل حتة " خير أجناد الارض " مع ان مافيش علي الموضوع ده اي دليل عقلي واحد واضح بس هنقول انه حقيقي يبقي من باب اولي يادولة انك تحافظي علي الخير ولا تسبيه يموت ويضيع ومايبقاش خير ولا حاجه ؟!!

هتقولي ما الناس دول الدولة بتحميهم بس الارهابيين بيفجأوهم هقولك برضه يبقي الدولة مقصره ف حقهم وحق اسرهم وحق كل من يتأثر او يتألم بموتهم .

وهم ايضاً شركاء ولو بنسبه ضعيفه جداً برضاهم عن الانتماء لنظام وفكر المؤسسة العسكرية ف الدولة ، واللي مُجبر يبقي الله معاه بقي " ماجبتتش واسطه ليه ؟"...

حاجة اخيرة الدولة المصرية اكيد عارفه ان الناس اللي بيتجند كل سنة ممكن يتبرع بكبده ف سبيل انه مايدخلش الجيش . المؤسسة العسكرية لازم تسأل نفسها ليه ده بيحصل وتصلحه علشان تحصل علي مجند خامته افضل من الموجود حالياً ...

وأخيراً رحم الله كل من علي ارض هذه البلد الحي منها قبل الميت...

#الجيش_المصري
#العقيده
#المجند